活在當夏

朝早9:30係皇崗口岸等民宿安排嘅車，今次坐個架係一架七人車....車程大約兩個幾鐘，不過因為塞車所以俾原定時間遲咗少少，要成十二點幾先到 ! 去到個老闆就安排好Ｄ房間俾我地，Ｄ房間都可以接受，之後就整咗個炒米粉俾我地食，話時話都幾好味，食下食下幾個人都食咗幾多下 ! 跟住我地就係呢個平海市入面四圍去睇。首先就去個古城到睇睇...但係我地就唔知行咗去邊，一路行一路搵，行咗入個成入面見到有一家人有Ｄ楊桃幾靚問可唔可以俾一個我地食...呀，個婆婆二話不說就俾咗兩個我地喇 ! 之後我地就行咗去個南灣到，行咗好鬼耐先到 ! 跟住頂唔緊要搵架摩托車坐我地去古城東門，不過就一架車坐咗成四個人，好似玩緊歡樂滿東華咁 ! 後來到咗之後我重聞到一陣囉味添呀 ! 之後就係古城行來行去，最後重買咗Ｄ野食下添....行完古城我地就返去等食晚餐，因為我地訂咗個海鮮晚餐。食嘅時間會同埋其他宿友一齊開餐，但係就每個 Party 一張檯，最期待嘅就係炭燒生蠔 ! 但係其餘嘅餸都好好味喎，總共有成差不多有九個餸連埋湯...食到食唔晒 ! Ｄ蠔真係好好味，又係無限量供應咁濟....食完沖完涼就訓覺囉...

今次食嘅呢間餐廳叫一門，其實佢都幾出名，不過出名係燒物到。但係我就覺得如果係一間好食嘅餐廳，無論佢整咩都係咁出色 ! 正如我屋企附近有一家家庭式經營嘅飯店一樣，真係咩都咁好味 ! 好...都係講返呢一家"一門"先，今次去食 Lunch，叫咗個"滑蛋吉列豬扒定食"，個定食包個飯之外重有一個麵豉湯同埋一個餐前小食，重有一杯飲品，我就叫咗一杯芒果汁。個滑蛋吉列豬扒都幾好味，塊豬扒都幾好味，有豬肉味同埋唔係炸得太乾身 ! 不過個麵豉湯就叫OK，麵豉湯始終都係覺得係銅鑼灣街市附近有一間食日本野嘅食店咁出色 ! 總體來講都幾好味，不過每個餐都要成七十幾蚊埋單，其實都幾貴下 ! 我地去到嘅時間一個人都無，可能比較早，一去到就問有無BOOK位，我諗呢一間餐廳午市都幾多人食。

深水埗，一個男人好鍾意去嘅地方...點解呢..因為有個電腦商場，附近重有條鴨寮街。其實係深水埗都有好多野食，有好多間都幾出名下，好似我家下講呢一間就係其中一間啦 ! 佢就係叫做維記咖啡粉麵，佢最出名嘅就係豬潤牛肉麵，重有就係咖央西多士。佢Ｄ豬潤牛肉麵都幾出色，因為如果有食過豬潤同牛肉嘅人就會知道，豬潤同牛肉要淋同埋吃落要有口感，呢間餐廳整得啱啱好 ! 同埋個湯都好出色，應該係豬潤湯來架 ! 咖央西多士其實都OK，不過比起新加坡嘅就無得比啦 ! 整體都幾好，去行深水埗又見肚餓的話，呢一間都係一個唔錯嘅選擇。

呢個係九龍灣嘅大型商場係舊年開幕，入面有好多大型嘅商店，其中一間就係B & Q，不過其實我係幾年前係深圳成日都光顧呢間大型家居用品店....都係唔講呢間 B & Q ，搵日開個新 Topic 講下先。講返呢次嘅主題 - 御苑皇宴，啱啱新開張大買廣告，見到呢一間御苑皇宴有鮑魚食，某信用咭消費有半價 ，重要係糖心鮑魚，嘩....我都幾鍾意食鮑魚架，不過食來食去都係罐頭鮑魚，糖心鮑魚真係未試過 ! 於是就去行下呢個商場同埋食野啦 ! 一去到就睇下有無得食...點知話訂位訂到八點先有臺....弊....失察,,唔記得打電話問下添 ! 但係無理由唔食架，重要係最後一日添 ! 於是就照跟，最多係行到八點.....之後就周圍行。七點半就返去再等位，個時已經見到人頭湧湧，等呀等...中間有Ｄ人不停咁問重要等幾耐，幾時有位 ! 有Ｄ人重發皮氣走埋添...終於都等到 ! 不過係搭臺..唔理，有得食就得 ! 好在做一步，因為Ｄ想食個款糖心鮑魚淨返一隻 ! 如果唔係就要叫貴好多個隻 ! 之後就叫多兩樣餸，有個重要係羅唔知咩獎添呀 ! 戲肉到...嘩，有專人係你面前煮個汁然後淋落隻鮑魚到....正 ! 第一次用刀叉食...Ｄ鮑魚好有鮮味，果然真係唔同 ! 之後食埋個飯...嘩 ! 好滿足呀`  個次都淨係記得食，唔記得影相....如果佢再做特價，我一定去食過 !

荃灣綠楊商場經過一大輪嘅裝修之後變咗做綠楊坊，係三樓原先係美心酒樓嘅位置畫分為好多間嘅舖位，其中一個舖位就開咗間好出名嘅食店 "南翔饅頭店"。呢間食店如果係週末你唔訂位的話，就要等幾耐下先有位，因為都成日人頭湧湧。

係灣仔到食 Lunch 都有平有貴，咩國家嘅菜色都有得選擇。呢一間砂煲砂煲我係個幾月前經過過，見個名幾得意同埋睇個餐牌五十幾蚊就有個 Lunch 食，所以決定咗搵日試下。呢間餐廳原來有砂煲砂煲食，唔怪得之叫呢個名啦 ! 重有都有好多明星來幫襯過架。我地一行二人叫咗個咖哩豚肉飯同埋一個雞柳餐定食，個餐係會跟個沙律、麵豉湯同埋甜品。個咖哩豚肉飯Ｄ豚肉係燒烤整出來，好惹味...Ｄ咖哩唔太辣，有日本咖哩風味。至於個雞柳定食就跟咗三文魚刺生、中華沙律同埋煎餃子，整體都好好味。最後個甜品係Ｄ生果糯米慈，不過去呢間餐廳到食，最好就係係十二點三前到，如果唔係就訂定位先，因為一到十二點半就無晒位，俾人BOOK晒。如果去開灣仔的話，呢個都係一個唔錯嘅選擇 !

嘩~~家下真係咩都加價，連平時食開嘅大快X都係三個月內加第二次價，其實平時我到唔多覺有加到價。只係聽到Ｄ人話街市Ｄ菜好貴，Ｄ豬肉有加咗價(呢個係因為先前供應量不足而加，但係加咗又唔會跌返落來)，Ｄ汽油又係咁加...但係最俾我感到有加價就係食早餐嘅餐廳不停咁加，重有就係平時會買Ｄ芝士腸、蜜糖腸係農歷新年前加咗一倍，平時買開8~9元，新年買成18元，諗住新年先咁貴，點知新年後價錢都係咁....唉~~唔知有無人工加呢.....

有日同屋企人慶祝生日去咗元朗呢間叫金泰釧嘅泰式食肆，其實呢間我先前都食過幾次。去呢到食我必定叫佢地嘅咖哩炒大蟹，因為真係幾好食。呢間泰國野食個老細開係屯門開咗間做泰式食品嘅舖頭，後來唔知咩原因無做。因為個老細係女人所以我認得佢，之後就係呢間到見返佢，先前呢間泰式係無咩人幫襯，後來唔知係唔係搵過Ｄ風水大師睇過，將個名改咗少少，生意就開始旺起來 ! (其實呢Ｄ都係我觀察到，我無去求證過 !) 佢個女好似有接受Ｄ唔知咩訪問就關於點樣管理一間公司...內容唔係好記得 !

事緣昨日無咩做，又見個廁所洗手盤去水嘅速度越來越慢，咁梗係用最簡單嘅方法，用個手動式泵去通一通佢啦....唔通尤至可，一通就o賴野....塞埋兼攪到成個廁所濕晒，原來個洗手盤有好多出水位，用個泵一谷就唔知係邊Ｄ地方有水走出來，做唔到個真空效果係吸唔到Ｄ積聚物出來 !....水就重可以去到水嘅...係去得慢到敵下敵下咁 !

上個星期同幾個朋友去呢一間唔知點解成日都有人排隊嘅 Pizza 店試下，好在先前Book 咗位，我地成7個人叫咗4個Pizza 、1個宮保Spaghetti、1個意大利粉、1個新加坡蝦卷(幾好味，不過好少)、1個BBQ味雞粒沙律同埋兩個甜品 ! Pizza 都 Ok，但係個兩個甜品真係唔係好得 ! 反而個2個意大利粉又幾好味喎....埋單每人要成HK$150...其實都幾貴，不過試下又無仿 ! 但係都係唔知點解要排隊囉 !!

上個星期搭車時候，有個亞叔突然吐咗啖痰落車箱地下。嘩 !大佬咩人來架...公眾地方咁攪，一Ｄ衛生常識都無，唔理其他人感受 ! 我咪即刻怒視佢，個亞叔唔知係唔係唔好意思就行去第二個車箱 ! 唉~~香港人真係唔記得早幾年嘅情況，大家顧下其他人啦....

包容見愛，無信生疑；心迷易亂，意靜理明 

心存有三點，代表你我他；衷心祝福你，開出陽光花