活在當夏

2009 日本東北自駕遊 Day 17

日期 : 9.11.2009  星期日

行程 : スーパーホテル宇都宮  > 男体山明智平ロープウェイ > 中禅寺湖 > 日光山 輪王寺 > 日光東照宮 > 日光二荒山神社 > 日光輪王寺大猷院廟  > Lunch@ 餃子 宇都宮みんみん > 宇都宮パセオホームページ UTSUNOMIYA PASEO >  宇都宮餃子像 > 宇都宮PARCO  > Dinner@ はなまるうどん 宇都宮大曽店 > スーパーホテル宇都宮 

總行程里數 :121 公里 – 大約 3 小時 41 分鐘

今日係行程嘅第17日，今日係原定個Plan嘅計劃去咗地方其實已經去咗架啦，所以係應該無地方去架。不過係酒店到見到有幾本介紹呢個區域嘅書，我哋就攞咗來睇下喇，因為我哋帶去嘅書仔係無呢一區嘅資料架。

睇完個幾本書，我哋今日就決定去日光市嘅景點，有中彈寺湖、東照宮同埋鬼怒川，不過最後我哋都無去到鬼怒川，因為去咗會好遲先返到宇都宮，重要無咩時間睇下呢個宇都宮。

行程第一個景點就係去呢個中彈寺湖，呢個湖係係一千七百幾米高嘅地方到，去到嘅時候都已經無晒紅葉啦，不過上去個湖嘅路有好多個灣，簡直就係好似頭文字Ｄ行嘅髮夾灣咁。我哋揸上去個時重有架垃圾車行得好快，重要快過我哋，架車真係見灣過灣，好似一架跑車咁~~~去到個湖都睇咗一陣，無咩特別，所以我哋影完相就走人去第二個景點喇。落返去又係要行返呢條好多灣嘅路，我哋數過呢到有成48個灣...真係行到頭都暈 !!

之後就去咗東照宮，去呢個景點就一定要泊係Ｄ收費嘅停車場啦，我哋搵過附近無唔洗俾錢嘅停車場。我哋兜咗一陣，見到一個老婆婆係到睇住個停車場咁辛苦，所以我哋就泊係呢個車場啦~~~

入咗東照宮又要買門票，不過睇書有種共通門票，係可以去晒主要嘅景點，但係就唔包括眠貓宮囉。呢張票叫做二社一寺共通拜觀卷，係價值1000日元架，可以去日光東照宮、日光輪山輪王寺、輪王寺大猷院同埋二荒神社。

我哋入到去個時都見到有唔少嘅旅行團係到，後來就真係去到人頭湧湧嘅階段啦，個間日照宮真係多人到呢，好似去緊街市咁，我哋平日來到咁多人，如何星期六、日到咪重多人 ?!!

講返呢個東照宮其實德川家康的陵寢，都幾金碧輝煌架，歷史話係一個叫勝道上人建立，然後由德川家康創建東照宮，令佢變得金碧輝煌，最後就由天海大僧做咗呢到嘅住持啦，詳細嘅資料可以睇呢到，不過我哋去到個時佢又係係到裝修緊喎。係入面有一隻神馬，佢會向人叩頭，我哋行埋去個時佢不停咁係到叩頭，好有靈性呀~~~

其餘個日光輪王寺、二荒神社同埋輪王寺大猷院都無咩特別，其間我哋入咗一部份嘅寺廟入面，有Ｄ日本人講解返一Ｄ歷史，重撞兩條唔知咩嘅木，係入面即刻有好勁嘅回音~~~

睇完晒Ｄ嘢，我哋就驅車返宇都宮，都要成個鐘先返到去呀~~我哋將架車泊返去酒店到，然後就做步兵行去JR車站到個商場到食餃子做Lunch啦。我哋揀咗一間尋日經過有好多人排隊個間，叫咗個有煎同埋有蒸嘅餃子套餐，味精就一般，所嘅八方雲集都重好食個佢呀...

食完嘢我哋就行下個商場，行咗成兩個幾鐘，買咗Ｄ嘢同埋搵到個餃子像影下相就差不多成五點啦。於是我哋就揸車去東武百貨到泊車(有一個鐘免費泊車)，然後行下附近嘅一條街睇下有咩食同埋有咩買下咁，但係呢...都無嘢睇同埋買嘅...

之後我哋就行咗另外兩個商場，但係因為得一個鐘嘅免費泊車時間，行唔得耐，最後都係搵唔到嘢食喎...

好在我哋來宇都宮個時記低咗一間食烏冬嘅食店位置，於是我哋就驅車去呢間食店到啦。呢一間又係我哋之前食過個一間嘅連鎖烏冬食店はなまるうどん 宇都宮大曽店，我哋叫咗個咖哩加烏冬、蛋、蘿蔔、牛腩、炸天婦羅同埋炸魷魚，重叫咗一個冷烏冬，都幾好食，食到我哋好飽呀~~~

食完就返酒店喇，因為聽日係最後一日要執下件行李先....