2009 日本東北自駕遊(1) 24.10.2009
好喇，要寫下呢個18日嘅日本東北自駕遊喇，由於本人住係呢個新界大西北嘅地方，班機就係朝早8:35，但係就要成六點幾搭車去機場喇。
一早去到機場點咁多人~~~咦 ! 原來呢一日都好多人去旅行架。
睇下去個時個喼都有成二十幾公斤重呀...
第一次搭西北航空嘅機，所以 Check-in 唔知係點喎，因為早一日已經係網上面做咗 Online Check-in ，所以應該去到機場淨係寄行李。但係就好多人囉，同埋家下好多航空公司都係用咗自助Check-in，即係未Check-in就自己Check-in埋，同埋Print埋張機票出來，然後去寄行李。做咗Online Check-in而又自己係屋企到Print咗張機票嘅，就直接去寄行李。因為我呢就無Print到張機票，所以就要係機場到Print喇。但係就弊家火，有好多人都唔識用呢個自助Check-in，企咗係部機到網住又唔識用，所以有時要醒目唔好跟住Ｄ十下十下嘅人，不過航空公司都有Ｄ職員係到幫手嘅 !! 寄完行李，緊係去醫下個五臟廟先啦~~~平時去旅行都係會食BurgerKing同大家樂，但係就食大快活。嘩~~行埋去見到條人龍真係好長下，好在Ｄ人食完就走，食完就入去海關出景喇。但係去到唔知點解今次無行過咩地方，唔去到候機嘅地方就夠鐘，攪到要奔走去上機 !!
每個機位都有電視機仔睇下架
飛機餐...味道都可以個喎..
係飛機到都無咩做，又係睇下有咩戲睇喇，不過呢個西北航空果然係做外國客多，全部嘅戲都係西片兼無字幕，都睇得幾辛苦，不過又好過無嘢做嘅。係機上面食下小食，過無耐就食返個 Lunch 。因為個早餐都食到幾飽下，所以都無咩點食到Ｄ嘢 !! 好快就到咗成田機場喇，過海關嘅過程都好順利，但係係等行李期間有Ｄ輯毒犬係Ｄ行李帶到巡邏，重有好多人都俾人查行李，唔知係唔係因為先前有香港藝人藏毒嘅關係呢 ?
大家見唔見到神犬拉西呢..
呢一日都有好多旅客去到成田機場...
出到機場就要搵下租車公司個 Counter 喇，轉咗 一兩 個圈都唔見喎，係網上面查過係係入境大堂附近個喎 !! 咁就問下Ｄ機場職員啦，原來係要繼前行先見到 。嘻嘻 ! 張 Print 好嘅確認信俾個職員，佢重問我係唔係租18日，可能真係無咩人會租18日咁長，俾咗錢之後就等佢哋攞架車來~~~係等咗期間買咗支嘢飲。
等咗大約15分鐘到，有個職員就示意話架車到咗，帶我哋去攞車。佢帶我哋行咗出去一個避車處。咦 !! 見到有架好型仔嘅白色車，呢架就係會陪伴我哋18日嘅車啦，就係 Toyota 嘅 Pruis 1.8 混燃車。去到有另外一個職員同我哋一齊Check下架車，同埋講下架車點用，不過其實佢都無咩點講到，可能同我哋溝通唔到呱 !!
呢個就係 Toyota Rent-a-car 嘅 Counter 喇..
呢架就係會陪伴我哋18日嘅戰車啦..外型係咪好靚仔呢..
呢個就係個 GPS System 喇..係個Monitor右下角隔離個圓圈掣就係個"Power"喇...
好喇，放咗行李上車我哋就出發啦。日本嘅 GPS 可以用電話去搵目的地，但係個職員其實無詳細咁講俾我哋知點用，又要摸一排先。開頭入咗電話，嘩~~~又唔識導航喎，原來係按漏咗一下 “Enter" 然後"Guide" 所以就開唔到個導航 !!
好啦，但係架車點用呢 ?? 唔同一般車喎，係混燃車來個喎，係香港都無揸過 !! 無車匙，得個搖控開閂門掣，架車重要得一個 “Power” 掣，究竟開著架車未架 ? 無Engine聲嘅 ! 左攪右攪，我就按一下個 “Power” ，咦 ! 弊 ! 架車熄咗嘅，咁頭先架車咪開著咗囉，但係一Ｄ聲都無喎。點開返架車呢 ? 按個"Power"掣一下先，唔得嘅，無反應喎 !! 架車都係無著到喎...職員又無講點開車喎，淨係講個搖控要放係個"Power"掣附近~~~重有就係佢走咗人喇喎..點算呢 ??
留言列表
