活在當夏

係去仁寺洞途中見到有一檔嘢食，睇個樣好似幾好味，於是就買一件食下~~~唔~~~好好食呀 (個音好似日日有食神入面個個美莉一樣 !!) ，呢見係一見蛋整嘅小食，入面有Ｄ CREAM ，真係幾好味~~~

去完LotteMart，我哋就去南大門都行下喇....呢個南大門都有Ｄ似香港嘅廟街，都幾地道下，呢到都有唔少舖頭買紫菜，不過我哋買咗就無睇到幾多錢 !

嘻嘻~~~呢排停咗好耐無寫到添，都係快Ｄ寫埋佢，如果唔係好快就會唔記得 !!

上個月同屋企人慶祝生日去咗佐敦新斗記食個晚餐，係網上面睇過下Ｄ資料，真係好壞參半，但係有一樣嘢就係要打電話去訂位先有得食 ! 但係個電話一係唔通一係就長響無人聽，真係少Ｄ恆心都去唔到唔到呢一間酒家食嘢 !

呢個Yahoo Blog耐唔耐就神神哋，我睇到有Ｄ人已經搬咗個Blog去第二Ｄ地方，因為佢哋成日同Yahoo 反映都無改善，話Yahoo有好多限制......呢排....又Short咗，完全無晒Ｄ回覆 Mail 提示，一有就....嘩~~~多到.....我之後都唔知睇咗幾多個喇...希望Yahoo做好Ｄ喇 !!

好...來到第8日嘅行程喇~~~~今日開始我哋要做步兵啦 ! 不過都係一個正確嘅決定來架，因為我哋係首爾都周圍睇嘢嘅同時我留意到係首爾嘅交通係成日到塞車架，重有就係泊位嘅問題，都唔係周圍都有位泊，所以如果大家去到首爾就唔好再揸車喇 !

哈哈~~~停咗好耐無寫到個遊記添~~~

去完還車之後，我哋就正式開始做步兵喇。首先就係東大門附近都行下先，睇下個東大門，係個東大門嘅其中一個入口，有個更庭係到，唔知係唔係因為舊年有條友燒咗南大門之後就整個實蕉係到睇住呢 ?! 然後我哋行去睇下呢個叫做新平和市場、東平和市場同埋呢個南平和市場，其實佢哋都係埋一齊，呢Ｄ市場香港就會有Ｄ似廟街，買下Ｄ電筒、一Ｄ玩具重有衫、褲、鞋襪都有得買，入面重有Ｄ舖頭食嘢添 ! 不過我哋全部都無幫襯過喎 !

今日係旅程中最後一日揸車嘅日子，我哋睇完大長今嘅華城行宮之後，就要向首爾出發，車程大約係一個鐘之內就會到達首爾市~~~~去到首爾第一個景點就係去63大廈喇 ! 但係未到首爾市就開始塞車喇，通常係市區嘅地方都係咁 ! 本來想搵個位去泊車，但係兜來兜去到搵唔到車位，最後我哋就無去到呢個 63 大廈。跟住我哋就去汝矣島到睇櫻花啦，因為其實就係隔離，好近 ! 但係係一路行就一路睇到越來越多人，重有就係個漢江公園點解會變咗一大達黃泥地嘅 ??? 都係唔理咁多喇，搵個地方泊車先 ! 但係兜來兜去都唔見有地方泊車嘅，好在行行下都見到，但係就Miss咗個路口，要兜個大圈返去個停車場。嘩~~~係呢個時候，要過一個路口都唔係咁容易，因為Ｄ人多到呢，過馬路係無停過咁有人行，咁啱呢個路口又無燈位喎....等咗幾耐先過到呀 ! 最後都入到個停車場~~~我哋就快手快腳去睇下呢個汝矣島啦，話時話，真係好多人，令我覺得好似行緊年宵市場咁 ! 想影張相都幾難，要影就會有好多人做佈景板喇 ! 呢個汝矣島Ｄ櫻花其實都開晒，有Ｄ開始跌落來添呀 ! 如果要睇最靚嘅時候，可能早多一至兩個星期會好Ｄ，好在我哋睇咗唔少櫻花啫 !

一早瞓醒就要去霸個公共廁所用，因為唔知點解尋晚好夜嘅時候多咗幾個住客入住，呢Ｄ公共設備真係要等先有得用 ! 刷好牙，執好晒嘢就等食早餐，其實先前問過可唔可以早Ｄ食早餐嘅呢 ? 因為我哋今日要去首爾，車程都幾遠下，個後生仔話唔得，定咗係8:30唔會改 ! 好在我哋就第一批用個廁所啫~~~之後個Ｄ都要係到等，不過只係女個邊要等咋~~~男呢邊係唔洗等嘅。執好晒Ｄ嘢，就係呢近同樂園入面應下相喇，因為其實都無實際睇過~~~之後差不多8:30就有個亞豬媽係到叫，我諗係佢哋已經準備好早餐呱，食早餐嘅地方係係另外一邊嘅。呢個韓式早餐其實都好簡單，有魚、菜、湯同埋食韓國嘢唔少得嘅配菜啦~~~基本上都幾好味 ! 食完呢一餐，我哋就要出發去今日第一個景點喇，就係叫做華城行宮，係位於水原市。由我全州去呢個景點要成三個鐘嘅車程，去嘅路程都無咩特別，但係唔知點解行行下就開始塞車喎 ! 重要係唔知點解個隻~~~~去到呢個水原市都成11:30喇，於是我就搵個位去泊低架車啦 ! 去睇呢個華城行宮係要俾入場費，承惠每位1,500won啦 ! 去到門口先知原來呢個華城行宮係因為拍大長今而搭建出來，拍完之後就變咗做一個景點喇 ! 入到去本來想搵個廁所方便一下，不過入面係無廁所嘅 !

我哋係個條購物街到都逗留咗唔少時間，都係時間要返去攞車，然後就Check-in啦....原來泊車嘅地方都幾近我哋今晚住個間韓屋，叫做全州韓屋體驗生活館，呢個係我係網上面Book嘅，一去到呢，就見都有位老伯係到招呼緊一Ｄ韓國人，睇個樣係Ｄ先生同學生，唔知係唔係畢業旅行呢 ? 我哋等咗好耐，俾張Book嘢嘅記錄佢睇，點知佢就打開一本簿表示今晚無晒房 ! 吓，唔係呀嗎 ? 我同佢講你哋Confirm咗個喎，點解會無嘅 ! 跟住佢就打電話，我聽到佢同電話入面個人講話Internet，可能係由網上面Book嘅有另外一個人負責都唔定，以呢個人又無係本簿到做記錄 ! 但係我哋無得住，咁點算呢 ? 之後呢位老伯就再打電話喇，跟住就同指我哋去另外一個地方，我哋諗佢應該係幫我哋係附近搵一間住，係咁嘅情況下我哋唯有去佢介紹個一間喇，係我哋走個時，個個老師同Ｄ學生啱啱返來，個老伯同佢講咗幾句嘢，個老師無神神同我哋講"Sorry"喎 ! 可能係個老怕話我哋本來係住係呢到，點知就俾你哋住咗~~~個老師先同我哋講"Sorry"呱 ! 我哋沿住佢指嘅方向同地址去到一間叫"同樂園"嘅韓屋 ! 我哋話係個老伯介紹來，有一個後生仔識得講英文，於是我哋就話要兩間房要有廁所嘅 ! 點知佢介紹一間係 VIP 房來嘅，要成150,000won一晚 ! 吓 ! 唔係呀嗎~~~我哋原先個間都係 160,000 won 有兩間要有廁所添個喎 ! 於是我哋就問佢可唔可以4個住一間呢 ? 佢話唔得，因為呢個價係包埋早餐，唔要早餐都係減30,000won~~~唔係好化算 ! 於是我哋問佢有無平Ｄ嘅呢 ! 有，50,000一間~~~不過廁所就要用公用嘅~~~因為有Ｄ團友覺得好唔方便想要有廁所間VIP房，但係真係唔係好抵 ! 於是，我就係附近再搵下，點知好多都滿咗。大家相量過之後，就租咗喇。跟住就出去搵食喇，係我哋頭先周圍行個時，叫做"校洞韓食"好似幾好味，咁就去呢一間喇。我哋睇咗個Menu，然後就點咗4個Set....嘩~~~Ｄ配菜真係有好多 ! 韓國食品....都係辣....呢一餐都有幾多樣嘢都係辣嘅，但係就幾好味 ! 食完嘢我哋就返去呢一間韓屋啦。其實呢一間韓屋，都幾有特色，Ｄ房真係幾細間下，只係鋪到一張被就無位 ! 我哋以為可能幾凍啦~~~原來地下有暖管，夜晚重覺得好熱添呀 !!

韓國全羅北道全州市

睇完呢個慶基殿同埋殿洞聖堂之後，打開地圖一睇，咦~~~~點解呢到又有個豐南門嘅 ??? 睇落去過條馬路就到，於是我哋就行過去睇下喇 ! 哦~~~原來真係有個豐南門架~~~咁我哋先前去個個係,咩來架 ??? 唔理咁多，都係睇咗先啦 ! 呢個豐南門同個Ｄ東大門呀~~~南大門呀，差不多...都係一度城門咁樣 ! 不過無得入去睇嘅  ! 睇完我哋就睇下地圖有咩睇啦~~~附近有一個叫全州客舍嘅嘢睇，睇地圖到幾近，但係行行下其實都要行成20分鐘到先到 ! 全州客舍係古時見國王嘅地方，同埋係俾當時朝廷入面Ｄ大官留宿同埋傳聖旨嘅地方。家下睇到只係得主棟個一部份係開放俾人睇，重可以俾我哋坐係到休息下囉....其實都無咩特別~~~~

呢個韓屋村其實真係幾多嘢睇，如果大家真係去的話，可以花2日時間係到遊覽下，講返我哋先，我哋一路行一路睇，行行睇地圖去咗一個叫"慶基殿"嘅地方。睇落去又唔係好遠個喎....咁我哋咪行去睇下喇....呢個慶基殿係免費參觀架 !

睇完呢個假嘅豐南門之後，我哋就揸車去睇一個叫做全州韓屋村嘅地方。原來都幾近下個喎，唔洗15分鐘就到咗喇。搵個位泊低架車之後就周圍睇嘢喇，我哋架車就泊咗係一間造紙嘅韓屋門口，其實呢個韓屋村基本上係以韓國照舊時嘅屋起，然後好多都係會前舖後居咁，非常有特色，絕對推介各位睇到我呢一篇嘅人去參觀下。不過，全州嘅交通唔係咁方便，大家可以考慮一下另外一個間首爾嘅韓屋村，叫做南山谷韓屋村，不過我無去過唔知道係咩樣~~~如果大家去過就話我知喇 !

睇完馬耳山之後，我哋就要去睇下全州其他嘅景點喇....有一個叫做豐南門嘅地方 ! 去豐南門就係正式踏入全州嘅地帶喇。去到全州市嘅時候個GPS帶咗我哋去一棟好似市政府大樓嘅地方，但係呢Ｄ又無位泊車喎 ! 我周圍兜來兜都無，所以就揸咗去另外一邊睇下有無位可以泊車喇 ! 哈哈...咁啱附近有間叫Home Plus 嘅百貨公司喎....通常呢Ｄ都係有得免費泊車個喎，咁我當然係揸入去泊低架車啦~~~由於時間都唔早土咁啱我哋又見到入面有個 Food Court 喎，當然係醫咗五臟廟先啦 ! 但係係去呢個 Food Court 嘅途中有團友已經被入面嘅護膚品公司吸引咗入去，重有收穫添~~~未到首爾已經開始進入作戰狀態喇 ! 買完嘢就去個 Food Court 到喇，呢到入都幾多款式揀下，但係有時太多都唔係一件好事，因為會花多眼亂 ! 最後我哋叫咗三個 Set ，嘩~~~~原來Ｄ份量都幾多下，夠晒4個人食呀 !

今日就要離開釜山驅車向全州方向出發，係去呢個全州之前，我哋會順道去睇下呢個馬耳山~~~資料話有好多櫻花睇個喎 ! 於是我哋就計畫去呢個馬耳山一遊喇.....原來由呢個釜山去馬耳山都要成差不多三個鐘先去到~~~~呢次我諗個 GPS 一定會帶我哋行IC路，果然不出我所料，真係全程都係行IC路。呢段IC路唔知係唔係因為長途嘅關係，每隔一段路程就會有一個休息站(有去過日本或者返內地搭長途車嘅朋友，你哋應該知係咩來嘅呢 !入面可以食下嘢，去下廁所、入下油、買下嘢食 )。我哋行咗一個鐘到就入咗去其中一個休息站方便方便喇...之後就繼續我嘅旅程，係過完一個隧道之後，一出就見到兩個山好似一樣嘢咁~~~就係馬耳...我哋終於都到咗馬耳山喇 !

睇完呢個鎮海市嘅櫻花，我哋就要驅車返去釜山去睇龍頭山公園同埋太宗台喇 ! 返去個段路同我哋來嘅有Ｄ唔同，個GPS個反應好遲鈍，行行下重點咗我行錯路，入咗IC路，之後我重衝咗閘添呀 ! 哈哈~~~間IC道路公司個職員叫我泊埋一邊，然後就係咁講嘢，我哋又唔知佢想點。俾錢佢又唔要喎 ! 講咗成5分鐘都唔知佢係想我哋做咩，原來佢係想我去佢哋個 Office~~~~真係~~~去到個Office諗住俾錢就算，呀~~又攪一輪，我同其中一個職員講我哋係行錯路，其實係想 U-Turn 走，最後佢哋都係唔洗我俾錢就叫我走 !! 但係我係到等佢哋唔知做咩嘅時間都有唔少人入來填Ｄ唔知咩嘢，然後就俾錢~~~我諗佢哋可能都係同我一樣都係衝咗閘 ! 之後就兜返轉頭行過，不過唔知點解要俾錢嘅呢 ? 因為我哋來嘅時候係唔洗行收費道路架，不過算喇....都係要靠GPS架喇~~~~無驚無險就到咗龍頭山公園，個GPS帶我哋去到一個停車場，於是我哋就泊車行上去個龍頭山公園喇~~~呀 ! 上到去，點解有咁多車泊咗係上面嘅~~~好似係唔洗俾錢個喎，重要係唔洗行咁多路呀嗎 ! 我懷疑呢個GPS收咗人哋錢，帶我哋去泊個要俾錢嘅停車場 !! 好啦~~~睇下呢個龍頭山公園，如果你唔上去個釜山塔到睇呢，其實就無咩特別嘢睇，都係公園一個，重有資料話有個水族館，但係我哋又唔見有喎~~~~不過就好多旅行團帶人來睇囉 ! 重見都有Ｄ韓國亞叔幫人影相添呀 !

食完個Lunch，我哋準備離開鎮海市喇，係走嘅時間，見到有一架纜車個外型幾特別，重向住個山上面行，於是我哋就去呢個地方到睇下喇。原來架纜車係會上去一個叫帝皇山公園嘅地方架 ! 呢架纜車係可以搭來回同埋單程嘅，我哋就買咗來回，每人盛惠3,000won啦 ! 買咗飛就上一層等車，原來都幾多人搭架，我哋都要等下先有得搭，其實呢架纜車我諗搭咗大約5分鐘到就到頂。上到去見到個塔，就叫做鎮海塔。參觀呢個塔都幾好，就係有Lift搭，唔洗行呀嗎 ! 去到個頂到，基本上可以睇晒全個鎮海市，不過好大風呢 ! 睇完我哋就去咗2樓嘅博物館到睇嘢，入面講咗呢個鎮海市嘅歷史同埋係鎮海市搵到嘅遺物。睇完我哋就周圍影下相，之後就等纜車搭返落去。但係其實我哋可以買單程，然後行返落去到得 ! 因為條樓梯唔係好長 (睇返資料原來都係得365級啫 !)。其實呢個鎮海市慢慢睇都可以睇成日，如果時間許可係海軍祭個段時間來睇，應該會多Ｄ嘢睇~~~~

好喇....行程到已經過咗一半啦。今日嘅行程就係要去鎮海市睇櫻花~~~真係要唱返幾句~~~Sakura~~~Sakura~~~Sakura~~~